Coursera платформасында курстарды алғашқылардың бірі болып меңгерген Д. Серікбаев атындағы ШҚТУ студенттеріне салтанатты түрде сертификаттар табысталды.

2023 жылдың қаңтар айында ҚР Ғылым және жоғары білім министрлігі «Coursera» – қазақ тілінде» бағдарламасын іске қосты. Бұл жоба Қазақстан студенттеріне орыс және қазақ тілдеріне аударылған әлемдік университеттердің 50 курсында оқуға, сондай-ақ 10 мың курс каталогына жазылуға және әрбір курс бойынша тегін сертификат алуға мүмкіндік береді.

Естеріңізге сала кетейік, курста оқуға Қазақстанның 15 университеті мүмкіндік алса, тізім арасында ШҚТУ-да бар. Біздің университетке 500 лицензия берілді. Бағдарлама көмегімен студенттер Гонконг ғылым және технология университеті, Мичиган университеті, Райс Университеті және т. б. әлемнің озық университеттерінде тегін білім алды.

2023 жылдың көктемгі триместрінде ШҚТУ бакалаврлары, магистранттары, сондай-ақ докторанттары Coursera-да оқу бастап, бүгінгі күні міндетті пәндер бойынша сертификаттар алды. Міндетті курстардан бөлек, кейбір студенттер бірден бірнеше курсқа жазылып, нәтижелі білім алып шықты. 21-БФ-1 тобының студенті Снегирев Глеб Валерьевич триместр бойы 8 курсты, оның ішінде міндетті курсты да сәтті аяқтады.

Жоба ШҚТУ студенттерінің білім сапасын жақсартуға және білім беру үдерісіне инновациялар енгізуге мүмкіндік береді.